Франкфурт 2019: Кинези, ама овие од Кина

Top News Новитети Поглед во иднината

Кинези, ама овие од Кина

Објавено на 14 септември 2019 година

Производителот на кинеските претседателски лимузини Hongqi се враќа во автомобилскиот свет, во голем стил и со големи амбиции. Колку големи, доказ е и тоа што го ангажираа поранешниот дизајнер на Rolls-Royce Xил Тејлор. Затоа и не е коинциденција што електричниот SUV-концепт E115 личи на Cullinan. Кинезите за него велат дека ќе има електрична автономија од 600 километри, дека ќе забрза до 100 km/h за помалку од 4 секунди и дека ќе биде опремен со систем за автономно возење од 4 ниво. Деталите за електричните мотори и батериите, како и плановите за производство, не ги објавија.

Вистинското изненадување сепак е хиперавтомобилот S9, за кој посебно истакнаа дека не е само концепт – тој со своите 1.400 коњски сили ќе се најде во производство во 2021 година. Моторот му е хибриден V8 турбо, а каросеријата од јагленородни влакна. Спектакуларниот дизајн е засилен со вратите кои се отвораат нанагоре. Кинезите велат дека ќе постигнува 400 km/h и дека ќе забрзува до 100 km/h за само 1,9 секунди. Иако цената ја држат во тајност, во Франкфурт се појавија гласини дека ќе достигне 2 милиони евра. Во план е производство на само 70 примероци.

клучни зборови: