Toyota најави дека подготвува идна генерација хибридни погонски склопови, наменети за целосно нова модуларна платформа која ќе подржува класични хибриди, плаг-ин и електрични автомобили.
Јапонскиот производител ја продолжува стратегијата за прилагодување кон барањата на различни региони и купувачи. Основниот акцент е ставен на компактноста, со употреба на помали електромотори, управувачки единици и инвертери, со што на инженерите им се остава повеќе слобода при конструирањето на идните модели. Еден од најважните потези е целосно новиот четирицилиндричен бензински мотор со зафатнина од 1,5 литри кој ќе биде понуден во атмосферски и турбо верзии.
Направен е да биде што е можно понизок што овозможува спуштање на предниот дел на возилото и поелегантни пропорции со аеродинамична силуета. Се проценува дека ефикасноста на новите технологии ќе биде подобрена за 15 отсто. Истовремено е објавена и веста дека Toyota планира своите погонски склопови да им ги продава на други производители од што се очекуваат годишни приходи од 1,5 милијарди евра.
