Продажба на нови автомобили » Глобален пад од 39 отсто

Top News Вести Занимливости

Глобален пад од 39 отсто

Објавените резултати од продажбата на нови автомобили бележат најголем пад во светот откако се собираат овие податоци

Објавено на 9 мај 2020 година

Со грдни маки, аналитичката куќа Jato Dynamics успеа да ги собере податоците за глобалната продажба на нови автомобили во март. А за нив друг збор освен дека се катастрофални не постои, бидејќи процентот на намалување од 39 отсто е најголем откако се собираат овие податоци. Американскиот пад е ист како глобалниот, а Кина започна да се опоравува и стигна до минус 25 отсто. Најлошо се разбира помина Европа, каде минусот стигна до 52 отсто. Подеталниот поглед ќе открие дека само во Исланд, Финска и Латвија продажбата е задржана на исто ниво, а Шведска е единствена земја која има едноцифрено намалување. Најпогодени се Италија, Франција и Шпанија, каде продажбата на нови автомобили се намали за меѓу 69 и 86 отсто.

Гледано по производители со забележаното намалување од само 13 отсто Porsche претрпе најмала штета, а после него се Lexus и Kia со 33 односно 34 отсто помала продажба. Според сегментите најпогодени се малите и повеќе наменските возила, додека учеството на електричните автомобили на пазарот се зголеми на цели 17 отсто. Импресивни резултати покажаа сите, најмногу Tesla Model 3 кој во март стана втор најдобро продаван автомобил на европскиот пазар. Се разбира, на тронот недостижен за другите се наоѓа Volkswagen Golf.