Затегање по стар рецепт
И во освежувањето Karoq не доби електрификација, па мора да се потпре на старите добри манири.
Многу е тешко да се направи дотерување на средновечен модел во добра кондиција. Со должина на каросеријата нешто помала од 4,4 метри, тој се лизга помеѓу големиот Kodiaq и помалиот Kamiq, а зад Octavia е еден од најпродаваните во гамата од Млада Болеслав. По четири години производство Karoq добива освежување, кое покрај оптичкото ретуширање, го проширува списокот на вградена технологија.
Затегнувањето на лицето е особено забележливо на предниот дел, уште повеќе нагласено со потесните фарови кои во врвниот модел имаат LED матрикс светло. Назад, потенките светла сега се опремени со динамична трепкачка сигнализација. Иако Škoda не смени ниту една компонента од тврд лим, коефициентот на отпор е намален за дури девет проценти на 0,30 поради оптимизацијата на аеродинамиката. Во реновирањето не беа предвидени „електричарските“ зафати, па Škoda сака да се постави на повисоко ниво по прашање на екологијата.
Во опционалниот пакет „Есо“ тапацирањето на внатрешноста е со вештачки текстури од вегански, рециклирани материјали. Амбициозната Sportline верзија има дополнителни ленти на вратите со карбонски изглед, спортски седишта со интегрирани потпирачи за глава и спортски волан со три краци. Зад ова, сите верзии сега имаат дигитална инструмент табла во формат од осум инчи, а поголемата верзија од 10,25 инчи е опционална. Моторизацијата останува непроменета. Основата е еднолитарскиот три цилиндраш со 110 КС, следен е 1.5 TSI со 150 КС, а врвот на понудата е 2.0 TSI со 190 КС.
Дизелот е во две нивоа на моќност, со 150 КС и 190 КС. Двата најмоќни мотори се комбинирани со погон на сите тркала и менувач со двојна спојка со седум степени на пренос. Škoda го произведува Karoq во Чешка, Русија и Кина, а од 2017 година досега се продадени повеќе од половина милион примероци. Иако имаше шпекулации во пресрет на фејслифтингот, Karoq нема да биде електрифициран или хибридизиран. За тоа ќе треба да се почека најрано до 2025 година кога треба да се појави следната генерација.
