Ретро изглед и погон од иднината
Комбинирајќи ги ретро изглед и погон од иднината, Peugeot ќе ни донесе задоволство во сегашноста
Објавено на 21 септември 2018 година
Името навестува, но не треба да залажува – доста интересниот Peugeot e-Legend концепт што ќе биде прикажан на салонот на автомобилите во Париз е супермодерен автомобил со електричен и автономен погон од иднината и ретро дизајн за кој инспирацијата е земена во богатото минато на марката. Да е сериски модел сигурни сме дека ќе биде продажен хит во ова денешно дизајнерски малку стерилно опкружување, но за жал (сé уште) не е – комбинирајќи ги двете крајности, изгледа како Peugeot да се бунтува токму против тоа.
Конкретно, како урнек за концептниот e-Legend има послужено митскиот 504 Coupe од ’70-тите години кој произлезе од перото на Pininfarina, додека за погон е задолжен електромотор со 340 kW и 800 Nm. Батеријата која располага со капацитет од 100 kWh со едно полнење ќе трае 600 километри, додека за дополнителни 500 километри би биле доволни само 25 минути да е поврзан на брз полнач. Според достапните податоци, овој 504 Coupe на иднината до 100 km/h ќе може да стигне под 4 секунди и да вози до максимални 220 km/h. Концептот е замислен како целосно автономно возило, но сепак постои режим наречен Legend каде возачот ја има контролата.
