Најновата студија посветена на британскиот пазар дава драматични заклучоци за состојбата на тамошниот пазар
Малкумина можеа да предвидат колку брзо кинеските производители на автомобили ќе доминираат на пазарот на прифатливи електрични возила. За помалку од една деценија, брендовите од Народна Република Кина од аутсајдери станаа лидери, преобликувајќи ја глобалната конкуренција толку драматично што традиционалните производители на автомобили во голема мерка се повлекоа од сегментот со помали димензии и пониски цени, вели новиот извештај што пристигнува од Велика Британија.
Студијата, објавена од Фондацијата ФИА, истакнува како порастот на мали, поволни електрични возила од Кина ги тера европските и британските производители да се концентрираат на повисоки класи на возила и премиум модели. „Кина, која сега учествува со 27% во глобалната продажба на патнички автомобили, обезбеди конкурентска предност во производството на помали електрични возила, со силни аргументи во клучните аспекти на производството на електрични возила, вклучувајќи ги синџирите на снабдување со батерии, ефикасноста на производството и софтверот“, се вели во извештајот.
„Тоа значи дека Кина еволуираше од увозник на патнички автомобили пред 2020 година во најголем извозник во светот.“ Според извештајот, ова доведе до тоа европските и британските брендови да го отстапат пазарот на прифатливи автомобили. Иако електричните возила од Кина беа задржани надвор од САД, тие стануваат сè почеста глетка во Велика Британија. Од сите нови автомобили продадени во Велика Британија во јуни, околу 19.000 од нив беа произведени од кинески брендови како MG, BYD, Omoda и Jaecoo.
Во моментов, на британскиот пазар се достапни повеќе од 130 модели на електрични возила, а од нив, 33 се со цена под 30.000 фунти (36.000 евра). Малите автомобили имаат голем потенцијал. Зголемувањето на бројот на кинески електрични возила би можело да помогне во мода да се вратат малите и компактни возила.
Извршниот директор на Фондацијата RAC, Стив Гудинг, изјави дека британската љубовна врска со автомобили со големина на Ford Fiesta би можела брзо да се обнови ако на пазарот почнат да се појавуваат повеќе мали, ефтини електрични возила.
Воедно, стимулациите од Министерството за транспорт на ОК би можеле да помогнат во зголемувањето на бројот на мали електрични возила на локалните патишта. Достапни се субвенции до 3.750 фунти (4.600 евра) за нови електрични автомобили, а во тек е изградба на повеќе од 100.000 дополнителни јавни места за полнење.
