Се подготвува духовниот наследник на суперлативниот LFA
Долго време, повеќе од деценија, светот се прашува дали Lexus ќе подготви наследник на LFA. Сега конечно се чини дека одговорот на прашањето е јасен – најновиот концепт на марката едноставно наречен Sport би требало да биде токму тоа.
Идниот спортски автомобил на Lexus што би произлегол од него е инспириран од GT3 тркачката програма на јапонскиот производител. Прогресивно е стилизиран, насочен кон иднината но сепак ја задржува спортската автентичност. Се одликува со широк облик со низок профил и во кој се спојуваат динамични и емоционални елементи. Место ретровизори има камери а задниот спојлер е активен.
Lexus даде многу малку информации за него. Во однос на погонската механика според некои извори се очекува да биде опремен со V8 мотор со хибридна испомош а според други да биде чисто електричен. Тоа ќе го дознаеме при крајот на идната година кога треба да дебитира, веројатно под ознаката LFR.
