Започнува нов милениум за BMW

Баварската компанија се откажа од Gran Tourismo верзијата на серијата 3, но ја воведе Gran Coupe изведбата на серијата 8

објавено на 9 мај 2019 година

Светот оди само напред. Автомобилите се сé поголеми, полуксузни, поскапи. Кога се појавија Gran Tourismo верзиите на сериите 3 и 5 се запрашавме дали на BMW навистина му требаат вакви модели. Времето покажа дека купувачите не се многу наклонети кон нив, исто како и за сличната изведбата на серијата 6 која ја носеше ознаката Gran Coupe. Бизнисот сепак не секогаш е компатибилен со емоциите, а неговите правила велат дека еден ваков модел треба да се има во гамата. Колку поголем, полуксузен и поскап, толку подобро.

Затоа и сега се појавува Gran Coupe варијантата на серијата 8 на BMW, која ќе биде над сé досега покажано. Премиерата ѝ е закажана за месец ипол, заради што не ги знаеме сите официјални детали за неа. Од досега познатото ќе ги издвоиме должината од околу 5 метри, од која поголем дел отпаѓа на меѓуоскиното растојание. Тоа во однос на стандардната осмица е зголемено, но засега не се знае за колку. Еден од моторите во понудата на 8 Gran Coupe ќе биде 4,4 литарскиот твин-турбо V8 бензинец со 530 коњи, спарен со 8-степен менувач. Може да се очекува и со трилитарски дизел со 320 коњски сили, кој секако ќе задвижува сите четири тркала. BMW за новиот модел меѓу другото има предвидено и адаптивно ослонување, активен диференцијал на задната оска и бројни електронски помагала. Гамата подоцна ќе биде дополнета и со спортската М8 варијанта со 600 или 625 коњски сили.

Продажбата на топ моделот на BMW ќе започне во септември.