Новиот Seat Leon ги зачини нештата во VW групата

Volkswagen оди на сигурно со Golf VIII, но новиот Seat Leon е повеќе од негова алтернатива

Објавено на 29 јануари 2020 година

Со моќен изглед и полн технологии, новиот Seat Leon со својот персоналитет навистина ги зачини нештата. Предниот дел со вертикалната маска со нов дизајн кој кон крилата визуелно е растегнат со тенките светла е уникатен не само во класата туку и во гамата на Seat. Спортските отвори за воздух во браникот со издолжените светла за магла го дополнуваат впечатокот дека Leon е направен да се додвори и на постојните и на новите купувачи. Динамичниот стајлинг продолжува низ мускулестата силуета кон задниот дел на кој погледот го приковуваат светлата со ЛЕД лента развлечена по целата широчина. Приказната во внатрешноста повеќе или помалку е очекувана, со мала забелешка дека дигиталната инструмент табла би можела да биде поголема. Управувачот е спортски засечен одоздола, а трендот на исфрлање на копчињата поддржан со мултифункционалниот централен дисплеј со кој се контролира скоро сé во возилото.

А тоа според димензиите порасна во однос на претходникот со должина зголемена за 86 милиметри. Меѓуоскиното растојание е растегнато за 50 милиметри, на задоволство на патниците на задните седишта. Поголем е и багажникот но само кај караванската Sportstourer верзија. Моторната понуда скоро целосна е преземена од Golf, што значи дека започнува со еднолитарскиот TSi со 90 коњски сили. Над него бензинците стратешки се распределени сé до максималните 190 коњи а дизели има само два – со 115 и 150 коњски сили. Место нив понудата е дополнета со две мајлд-хибрид варијанти со 110 и 150 коњи, спарени исклучиво со DSG трансмисија. Голема новост е плаг-ин хибридот со 204 коњи и електрична автономија од 60 километри, а понудата ја заокружува верзијата со погон на природен гас со 130 коњски сили и три резервоари кои обезбедуваат автономија од 440 километри.

Продажбата на новиот Leon ќе започне во втората половина од годинава.