Најголемите европски пазари преполовени во мај
Минусот од 56,8 отсто во мај всушност е прв сигнал за опоравување
Објавено на 19 јуни 2020 година
Сите европски пазари што ги следи европската асоцијација на производители на автомобили ACEA забележаа намалување – од 29,4 отсто кај Кипар до 89 отсто во Велика Британија, или во просек 56,8 отсто. Освен британскиот, другите најголеми пазари сепак се подобри од просекот – Германија со -49,5, Италија со -49,6 и Франција со -50,3, додека Шпанија го заврши мај со -72,7%. Овие пет земји учествуваат со повеќе од 70 отсто во европската продажба. Од почетокот на годината бројот на нови патнички автомобили во 30-те земји колку што следи ACEA е намален за 42,8 отсто во однос на истиот период лани. Минусот е најголем е во Хрватска (55,8%), а најмал во Финска (20,9). Во поглед на производителите најмногу настрадаа продажбите на Mazda (54,3) и Honda (53,7), додека најдобро со минус од 31,5 отсто помина Toyota. Најголемиот Volkswagen во првите пет месеци има намалена продажба за 38,4 отсто. Иако е јасно дека и второто тримесечие ќе биде погубно, сепак опоравувањето на пазарот до крајот на годинава треба да го сведе минусот на околу дваесет отсто.