Новитет кој изгледа како да го промашил векот

Меѓу бескрајните специфичности кои владеат на јапонскиот автомобилски пазар е и постоењето на вакви модели

Објавено на 6 ноември 2017 година

Toyota Century е наменет е за државници и видни личности кои својот статус во општеството го покажуваат и на овој начин. Меѓу нив се и членовите на јапонското царско семејство, што ги наложува конзервативноста во дизајнот и префинетоста во изработката. А таа пак е подигната на ниво на уметност. Луксузот е императив, но со еден исклучок – седиштата се обложени со волна а не со кожа. Таа имено знае да шкрипи кога се седнува на неа, а во Јапонија тишината е доста ценета. Затоа и во новиот модел посебно внимание е посветено на врвната звучна изолација. За бесшумното возење ќе придонесува и хибридно облагородениот петлитарски V8 мотор, за кој не се објавени техничките податоци. И покрај впечатокот што го остава, во овој јапонски Rolls-Royce се среќаваат многу модерни технологии. Дел од опремата меѓу другото се и адаптивните ЛЕД светла и бројните безбедносни системи. На патниците назад на располагање им се седишта кои се подесуваат во безброј насоки и имаат функција за масажа, како и мултимедијален систем со 20 звучници. Должината од 5,3 метри и меѓуоскиното растојание од 3,09 метри им обезбедуваат и огромен простор.

Toyota Century се произведува од 1967 година, а верзијата претставена на салонот во Токио е негова трета генерација. Со оглед на сé овој модел и не е така скап – неговата цена изнесува стотина илјади долари. Куриозитет е и тоа што на него никаде не се среќава логото на Toyota.