Со нови сили во нови победи
На салонот во Лос Анџелес Kia го покажа обновениот Sorento
Sorento како еден од стожерите на Kia во Америка секако е заслужен за создавање на довербата што купувачите ја имаат во возилата на корејскиот производител – 2005-тата кога се појави на пазарот продажбата на марката скокна за неверојатни 440 отсто. Затоа и секоја негова нова генерација или обновување се прави темелно и добро обмислено. Така е и сега кога четвртата генерација доби ново лице согласно авантуристичкиот Opposites United дизајн.
Атлетски мускулестиот преден дел ја комбинира впечатливата маска со нови вертикални светла, а назад модификациите се ограничени само на браникот и светлосните групи. Во внатрешноста се среќава панорамски заоблен дисплеј кој со состои од два 12,3-инчни екрани од дигиталната инструмент табла и инфо-забавниот систем. Унапредена е и електронската опрема чиј дел сега е и дигиталниот клуч. Под хаубата се среќаваат атмосферски и турбо 2,5 литарски четирицилиндрични мотори со 191 и 281 коњска сила спарени со осумстепена трансмисија, додека погонот на сите четири тркала е опционален. Дизајнерски и технолошки третман на подмладување ќе добијат и хибридната и плаг-ин верзијата, но малку подоцна.
