Само за одбрани

BMW има долга традиција на блиндирање на своите лимузини и новата серија 7 не е исклучок

Уште при развојот на класичната и електричната серија 7 беше предвидено да добијат блиндирани изведби. Со додавка Protection во ознаката, тие однадвор скоро да не се разликуваат од стандардните модели за да не се привлекува внимание кој се вози во нив. Структурата е засилена да издржи напад со гранати или дрон со експлозивно полнење, а посебниот систем за довод на кислород во кабината и автоматското гаснење на пожар се подразбираат. Од разбирливи причини многу детали не се откриваат, но затоа се знае дека патниците преку посебен интерфон можат да комуницираат со луѓето надвор без да ги отвораат вратите или дебелите стакла кои се загревани за да се обезбеди видливост и во студените денови. Плус на тоа резервоарот за гориво има можност за самозаптивање во случај да го погоди некој куршум.

Двете блиндирани лимузини механички се базирани на бензинскиот 760i и електричниот i7 xDrive60, но заради екстра тежината перформансите им се значително послаби. Заради истата причина засилени се и системот за ослонување и сопирачките. Цената не е позната.