Австралискиот Јапонец од Тајланд
Во Европа скоро заборавен, единствениот пикап на Mazda го доби својот редовен фејслифтинг
Објавено на 24 мај 2018 година
Пикапот Mazda BT-50 механички е идентичен со Ford Ranger и се произведува во нивната заедничка фабрика во Тајланд. Но затоа дизајнерски сосема е различен и однадвор на двата модела исти им се само стаклата и покривот. И додека Ranger сé повеќе го освојува светот, по некоја случајност Mazda BT-50 ја задржа популарноста само во земјите каде се вози по левата страна. Една таква е и Австралија, каде всушност е и развиен. 
Mazda го прилагоди посебно за овој пазар нудејќи го во верзии кои одговараат на потребите на тамошните купувачи. Меѓу нив е и камионската изведба, која може да прими и различни надградби. Остатокот од каросеријата не се многу разликува од досегашниот модел. Предната маска е ревидирана, браниците сменети а нов дизајн добија и неколку стилски детали. Внатрешноста е унапредена со неизоставните конективни системи, а опременоста дополнета со безбедносни асистенти.
Моторната понуда е идентична како и кај Ford Ranger. Основниот 2,2 литарски дизел развива 130 или 160 коњски сили, а на располагање е и помоќниот 3,2 литарски мотор со 197 коњи. Таму каде бензинот владее Mazda BT-50 ќе биде понудена со 2,5 литарски агрегат со 166 коњски сили. Погонот може да биде на задните или сите тркала, преку 6-степена мануелна и автоматска трансмисија. Овој модел на Mazda не се продава ниту во Јапонија.
