Активно во битка за купувачите

Година ипол после лансирањето во Европа, Ford го освежи малиот градски модел Ка+

Објавено на 19 февруари 2018 година

Изворно наменет за пазарите во развој, Ford Ka+ како помалку софистициран од своите европски конкуренти не помина така добро на пазарот. Редизајнираната генерација треба да го поправи тоа, во што ќе ѝ помогне новата Active верзија. Напред се забележува новиот браник кој во комбинација со маската делува поелегантно. Назад се направени само минимални измени додека внатрешноста е култивирана со нови материјали и побогата опрема. Се издвојуваат доработената централна конзола со вграден екран чувствителен на допир и можностите за поврзување со Android и Apple уредите. Ford ќе го нуди обновениот Ka+ со три мотори. Бензинците ги претставува новиот трицилиндричен агрегат со зафатнина од 1,2 литри и максимални 70 и 85 коњски сили. Дизелот останува проверениот 1,5 литарски TDCi со 95 коњски сили.

Поголеми надежи се полагаат во Active изведбата која има за 23 милиметри поголем клиренс и модификувано ослонување. Дизајнерски се разликува по пластичните заштити околу возилото и поагресивната маска. Моторната понуда е иста, додека за погон на сите тркала не станува ни збор. Цените на обновениот Ka+ во Германија ќе стартуваат од 10 илјади евра. Ford во Европа лани продаде 51 илјада примероци од Ка+, а од Fiesta пет пати повеќе.