Поголемиот дел од денешната епизода ја посветуваме на моторциклите, но никако нема да ги заборавиме автомобилите. Конечно објавени се условите со кои производителите ќе мора да се прилагодат на нормата за емисијата на штетни издувни гасови Еуро 7. Денешните новитети Volvo EX-90 и Audi Q8 e-Tron нема да се замараат со тоа бидејќи се потполно електрични. Денеска ќе го видите тестот на Jaguar E-Pace, но започнуваме со Милано кој уште еднаш беше центарот на светот на две тркала. Организаторите на ова 79-то издание на EICMA се пофалија дека собрале дури 1.370 брендови од 45 земји. Како и пред пандемијата публиката во голем број ги преплави шесте саемски павилјони сакајќи да се запознае со најновите достигнувања. Ги издвоивме најзначајните.
