Прво на штекер, па на пат!

Потежок од 2,5 тони Bentayga ќе може да помине 51 километар со нулта емисија

објавено 20. јануари 2021

После летниот фејслифтинг, Bentley започна и механички да ја обновува понудата на Bentayga. Согласно стратегијата во наредните пет години сите модели да бидат електрифицирани, ставен е акцент на постоечката плаг-ин хибридна варијанта која е подобрена. Главните параметри на погонската група останаа исти – трилитарски бензински V6 мотор и електромотор кои заедно испорачуваат 449 коњски сили и максимални 700 њутн-метри вртежен момент. Батериите и понатаму се со капацитет од 17,3 киловат-часа, но заради новата контролна единица сега овозможуваат електрична автономија од 51 километар. Тие има гаранција од 8 години или 160.000 поминати километри, а за целосно полнење се потребни 2,5 часа. На возачот на располагање му се три режими на возење, а само на струја може да се вози до брзина од 135 километри на час. Забрзувањето до сто на час трае 5,5 секунди, а максималната брзина е 254 километри на час. Цената сé уште не е соопштена, но се очекува на британскиот пазар да изнесува околу 140.000 фунти. Од Bentley тврдат дека просечната потрошувачка изнесува 3,3 литри на 100 километри а емисијата на јагленород диоксид 78 грама на километар. Сето друго е како и кај Bentayga со моторите со внатрешно согорување, што значи многу луксуз и напредни технологии. Меѓу нив покрај Apple Car Play, за прв пат е и Android Auto конективноста. Новост е и тоа што во понудата ги нема веќе дизелот и мастодонскиот шестлитарски W12 мотор во основната изведба, додека неговата посилна Speed варијанта останува.