Ем турбо, ем хибрид
Porsche за моделската 2020 година ја збогати понудата на Cayenne
Објавено на 13 август 2019 година
Со ознака Turbo S E-Hybrid, најмоќниот Porsche Cayenne со своите 680 KS набргу ќе се најде на пазарот по цена од 172.600 евра во Германија. Нарачки за него веќе се примаат, а купе верзијата ќе биде за околу 4 илјади евра поскапа. За сите тие пари купувачите ќе добијат 4,0 литарски битурбо V8 мотор со 550 KS и електромотор со 136 KS. 
Ангажирани заедно ќе го забрзаат до 100 km/h за 3,8 секунди и дотераат до максимални 295 km/h. Само со електромотор ќе може да се движи до 135 km/h, но не повеќе од 40 километри колку што автономија обезбедуваат литиум-јонските батерии од 14,1 kWh. Porsche уште наведува дека просечната потрошувачка изнесува 3,7 литри и 18,7 kWh на 100 km. Разликата во цената од преку 30 илјади евра во однос на регуларниот Cayenne Турбо треба да ја оправда и стандардната опрема во која се среќаваат карбон-керамички сопирачки, воздушно ослонување, тркала од 21 инч, Torque Vectoring систем, Chrono пакет, Launch Control…
За оние пак кои се повеќе по ефикасноста а помалку по перформансите постои и попристапна верзија на Cayenne и Cayenne Coupe со хибриден погон. Во ознаката ги нема Turbo и S, а под хаубата ѝ фалат два цилиндри, еден литар работна зафатнина и 218 коњи. Така спакуван забрзува до 100 km/h за 5,1 секунда, постигнува 253 km/h и троши 3,1 литар гориво и 17,7 kWh на 100 km, a на струја ќе помине 43 km. Цената во Германија изнесува 91.684 евра, плус уште нешто а 4 илјади за купе верзијата.
