Volvo конечно го претстави својот прв електричен моноволуменец, моделот со ознака ЕМ90.
За да го свртат вниманието на јавноста Швеѓаните досега за него неколку пати ни сервираа доза информации, случајно или намерно заборавајќи понешто да ни кажат.
Така сега кога го гледаме во целокупното свое издание овој моноволуменец делува повеќе премиум отколку што се очекуваше. И поголем за што се погрижија неговите габарити – должината од 5,2, широчината од два и височината од 1,86 метри. Меѓуоскиното растојание му е растегнато на 3,2 метри, а тежината искачена на дури 2.760 килограми.
Добар дел од неа отпаѓа на батериите со капацитет од 116 киловат-часа кои ќе му обезбедат автономија од 738 километри према кинеските стандарди. Електромоторот со 272 коњски сили ги задвижува само задните тракала, забрзувајќи го до 100 километри на час за 8,3 секунди. Внатрешноста е исполнета со сé што може да се замисли за удобни патувања на шест патници.
Дури и повеќе од тоа, за што сведочат аудиосистемот Bowers & Wilkins со 21 звучник, централниот екран од 15,4 инчи и уште еден со слична големина поставен на покривот кој може да се користи за забава или деловни видео состаноци. За почеток Volvo EM90 ќе им биде достапен само на купувачите во Кина каде ќе се произведува и продава за високи 118 илјади долари, а кога ќе стигне во Европа и Северна Америка не е објавено. Не е кажано ни дека тој е само добро преработена верзија на Zeekr 009, но тоа сите веќе го знаат. 
