Војната меѓу ПОЦ и пазарџиите заврши, постигнат мировен договор

Објавено на 15 февруари 2020 година

После период на неизвесност, јавното претпријатие Паркинзи на општина Центар и пазарџиите од Зелен пазар, заедно со општината Центар и Скопски пазар постигнаа договор за надминување на проблемите на паркиралиштето кај Аутомакедонија. На меѓусебната средба беа разгледани доставените барања од пазарџиите и се разговараше за нови ефикасни решенија кои се во интерес и на жителите и на трговците од зелениот пазар, по што беше изнајдено решение за иднина. Според него Паркинзи на општина Центар идниот март ќе го уреди дивиот паркинг позади Зелен пазар кој моментално е во хаотична состојба и не е функционален ниту за жителите ниту за корисниците на услугите на Скопски пазар. На ова неуредено паркиралиште ПОЦ ќе постави нов систем за контрола на влезно-излезни рампи со кој едниот дел ќе биде наменет за товарните возила на пазарџиите, а останатиот дел резидентен паркинг за жителите од улицата 11 Октомври и булеварот Кочо Рацин. Со отворање на ова паркиралиште, паркиралиштето Аутомакедонија целосно ќе се ослободи од товарните возила и ќе им овозможи на жителите брз и лесен пристап до нивните домови. Општина Центар во координација со пазарна инспекција ќе ја преземе одговорноста за дивите пазарџии на паркиралиштето кај Аутомакедонија.