BMW iX3 претставува пресвртница во трансформацијата на компанијата за електрификација, дигитализација и циркуларност.
Кога пред две години BMW ја најави Neue Klasse наговести мала револуција во сопствените редови на сите нивоа во идните производи.
Не се работи само за нова платформа која ќе поддржи различни погони, тоа е нов начин на кој ќе се имплементираат најнови дизајнерски и технолошки иновации што ќе го обликуваат целиот моделски опсег на брендот во иднина.
Во технологиите на Neue Klasse ќе бидат вклучени вкупно 40 нови модели и ажурирања на моделите од сега до 2027 година. Новата генерација iX3 е првиот сериски произведен модел Neue Klasse. Во склад со електричните амбиции на марката iX3 е целосно електрично спортско-активно возило кое го отвора патот на една сосема нова ера во која, како и кај претходниците, во фокусот е чисто задоволство при возењето.
За да дојдеме до возењето прво треба добро да го погледнеме новитетот. Се добива впечаток дека е прескокната цела генерација на возила. Оваквата импресија ќе се потврди кога ќе ги видиме и најавените идни модели во догледно време. Употребата на нови форми обезбедува модерна интерпретација на оригиналниот и траен план на BMW.
Дизајнот е безвременски, а воедно го доловува и духот на „новото време“. Новиот BMW iX3 ги прикажува вредностите и квалитетите на Neue Klasse во рамките на спортско-активно возило. Со должина од 4.782 милиметри, ширина од 1.895 милиметри и висина од 1.635 милиметри, новиот BMW iX3 има карактеристични пропорции.
Дизајнот е исполнет со робусност и прецизно акцентирани линии што ги нагласуваат сите четири тркала. Капацитетот на товарниот простор на новиот BMW iX3 може да се зголеми од 520 на максимум 1.750 литри со склопување на наслоните за грб на задните седишта. Дополнителниот простор за складирање под хаубата може да собере уште 58 литри товар.
Оптимизацијата на деталите на аеродинамиката овозможува коефициент на отпор на воздух од 0,24. Дизајнот на ентериерот на BMW iX3 поставува нови стандарди во однос на модерноста и дигиталното искуство. Внатрешноста има уреден, минималистички дизајн, обезбедувајќи идеална сцена за дигиталното искуство.
Кабината е посветена со јасен фокус на возачот по кој е познат BMW и удобноста за сите патници. Архитектурата на возилото овозможува исклучително дарежливи нивоа на простор на сите пет седишта. Новата електронска и софтверска архитектура, вклучувајќи четири високо-перформансни компјутери што формираат „супермозок“ и го прават првиот модел Neue Klasse поинтелигентен и подобро опремен за иднината.
Хоризонтално распоредениот кокпит е новиот систем за контрола и управување BMW Panoramic iDrive, кој е базиран на исто така новоразвиениот BMW Operating System X. Тој ги спојува дисплеите, геометријата и дизајнот на светлината и звукот во холистичко искуство. Панорамскиот iDrive се протега по целата должина на предната конзола, го зголемува фокусот на возачот, снабдувањето со информации и ергономијата.
Тој обединува четири клучни елементи, а тоа се панорамска проекција, централен дисплеј во слободен дизајн, мултифункционален волан и 3D Head-Up дисплеј. Во позадината возачот добива поддршка од интелигентен личен асистент, обемни подобрувања и постепено воведување на технологијата за природна гласовна интеракција. За употребливоста, асистентите, новите апликации, компјутери и процесори може да се пишува на долго и на широко.
Сепак тука станува збор првенствено за возило. Да, на високо ниво софтверски дефинирано, но што може да се очекува од неговата вистинска намена, возењето? Технологијата BMW eDrive од шестата генерација, развиена за Neue Klasse, се состои од високо ефикасни електрични мотори, нови високонапонски батерии со цилиндрични ќелии и технологија од 800V.
BMW iX3 50 xDrive е првиот претставник на новото семејство. Него го погонуваат два електрични мотори, кои заедно генерираат моќност од 345 kW/469 КС и 645 Nm вртежен момент. Забрзува од 0 до 100 км/ч за 4,9 секунди и достигнува максимална брзина од 210 км/ч. Неговата конфигурација со електричен погон на сите тркала се состои од опширно надграден електрично возбуден синхрон мотор (EESM) со особено високо ниво на ефикасност на задната оска и, на предната оска, нов асинхрон мотор (ASM) кој се одликува со својот компактен дизајн и висока ефикасност.
Ваквата комбинација на погон развиена за Neue Klasse ги намалува загубите на енергија за 40 проценти во споредба со технологијата BMW eDrive од петтата генерација, тежината е намалена за 10 проценти и трошоците за производство за 20 проценти. Новиот концепт на високонапонска батерија со цилиндрични ќелии за Neue Klasse, исто така, постигнува значителен напредок.
Густината на енергија на ниво на ќелии е за 20 проценти повисока отколку на eDrive од петтата генерација, а новиот концепт, исто така, го отвора патот за зголемување на брзината на полнење од 30 проценти. Цилиндричните ќелии се интегрирани директно во високонапонската батерија. Дополнително на тоа, високонапонската батерија е интегрирана во архитектурата на возилото како структурна компонента за минимизирање на тежината.
Високонапонската батерија во BMW iX3 50 xDrive има употреблива енергетска содржина од 108,7 kWh, овозможувајќи опсег до 805 километри во WLTP циклусот и максимална брзина на полнење од 400 kW. Она што особено ги интересира екологистите е колку е „зелен“ BMW iX3?
Различни параметри гарантираат дека јаглеродниот отпечаток на новиот BMW iX3 50 xDrive во текот на целиот негов животен циклус, мерено во CO2 еквиваленти, и врз основа на километража од 200.000 километри, е за 34 проценти помал од оној на неговиот претходник.
Ова значи дека, кога се користи енергија добиена од европскиот микс на електрична енергија, тој ќе има помал јаглероден отпечаток врз основа на вкупниот животен циклус од споредлив модел со мотор со внатрешно согорување откако ќе помине околу 21.500 километри. Ако автомобилот се полни исклучиво со електрична енергија од обновливи извори, треба да помине само 17.500 километри пред да стигне до истото ниво.
Првиот модел Neue Klasse ќе се произведува во новоизградената фабрика на BMW Group во Дебрецен, Унгарија. Првата варијанта на целосно електричниот SAV што ќе излезе од производствената линија од есен 2025 година ќе биде BMW iX3 50 xDrive со 345 kW/469 КС и електричен погон на сите тркала. Ќе следат и други целосно електрични варијанти, вклучувајќи и модел од основно ниво.
Лансирањето на пазарот на новиот BMW iX3 ќе започне во Европа на пролет 2026 година, а во САД во лето 2026 година. Исто така, идното лето ќе започнат испораките на варијанта на новиот BMW iX3 произведена во фабриката во Шенјанг, која е специјално прилагодена на потребите и желбите на клиентите во Кина.
