Модерната реинтерпретација на иконскиот модел од 1970-тите успешно ја спојува секојдневната употребливост со релативно долг дострел, забавен карактер на возење и огромна доза на ретро шарм.
Кога велот го откри Renault 5 Prototype во 2021 година, француската компанија не можеше ни да предвиди колку добро ќе биде прифатен ретро дизајнот. За да се извлече максимумот од воодушевувањето, уште на почетокот беше одлучено дека производствената верзија мора да остане што е можно поверна на прикажаната студија.
Кога на пазарот се појави комерцијална верзија, бев исклучително среќен што видов дека Renault успеал да ја задржи привлечноста на моделот 5, мешајќи многу ретро елементи со модерен став и, се разбира, современи електричен погон. Малку е веројатно дека Renault 5 E-Tech ќе биде прв на листата за семеен автомобил, но повеќе од сигурно е дека тој ќе котира високо кај финансиски добро ситуираните носталгичари гладни за модерни технологии.
Модерниот R5 е уникатен по својата појава. Извонредно успешно е направен како електрично возило кое е погодно да служи на двојка или само на една личност. Убавината можеби е во окото на набљудувачот, но тешко е да се тврди нешто поинаку отколку дека Renault 5 изгледа апсолутно фантастично.
Кругче околу R5 E-Tech Iconic
Мојот став можеби е пристрасен поради познавањето на оригиналниот Renault 5, лансиран минатиот век, но сметам дека модерниот е привлечен дури и ако никогаш не сте го виделе неговиот претходник.
Каросеријата на современиот R5 има должина под четири метри поставена на 18 инчни алуминиумски тркала. Паметните LED фарови потсетуваат на квадратните оригинали, иако новиот автомобил добива свој модерен, препознатлив светлосен мотив кого го поддржуваат големите светла за магла. Тие потсетуваат на светлата на оригиналниот Renault 5 Turbo, а токму тој спортски модел е оној што дизајнерите го земаат како инспирација за новиот автомобил.
Оттука и обликот на линијата на покривот и задниот спојлер и навестувањето на мускулести лакови на тркалата напред и назад. Сосема ефективна е конверзијата на хаубата. На местото каде што се наоѓаше отворот на оригиналната „петка турбо“ сега стои стилизиран осветлен број 5 што служи како индикатор за нивото на полнење. Исто така, во фаровите има мали француски знаменца и автомобилот ви намигнува кога ќе го отклучите, додека наклонот на задната врата и целокупниот изглед на задните светла се јасно инспирирани од предокот.
Некако сè се спојува во еден привлечен пакет што се чини дека добива универзално одобрување. Бојата Pop Yellow ја вжештува атмосферата и несомнено го привлекува вниманието.
Поглед во внатрешноста
Ретро атмосферата не е толку силна внатре, иако предните седишта добиваат препознатлива форма како оние во оригиналниот R5 Turbo. Но, останатото е ултра модерно. Кога влегувате во кабината силен впечаток остава графиката на двата 10 инчни екрани и звуците компонирани од легендарниот Жан Мишел Жар, кои прават, особено ноќе, спектакуларна претстава.
Централниот екран на допир има јасна графика со интуитивно мени преку кое можете да ги контролирате сите функции. Поврзувањето со паметниот телефон е лесно и одлично функционира. Се напојува со системот „OpenR Link“ на Renault со вграден Google и работи навистина добро.
Интеграцијата со Google значи Google Maps, Google Assistant и до 50 други апликации достапни преку продавницата Google Play. Ако навистина сакате, секако можете да користите жичен или безжичен Apple CarPlay и Android Auto. Ова е првиот автомобил од компанијата што го има својот нов аватар „Reno“, претставен како виртуелен придружник за патување.
Може да реагира на влезните информации од возачот (на пример, има можност за ChatGPT), но исто така проактивно дава предлози или префрлување на поефикасно поставување за возење. За среќа, климатизацијата се контролира со посебна група физички прекинувачи, како и кај повеќето Renault модели.
Предните седишта имаат многу прилагодувања, така што лесно се наоѓа идеалната позиција и има многу простор напред. Цената на тоа е можеби тенката централна конзола со само скромно количество простор за складирање, но треба да се потсетиме дека ова е автомобил што не е големо семејно возило.
Барем сето тоа се чувствува добро направено. На прв поглед можеби нема да ги забележите надворешните рачки на вратите за пристап до задните седишта, што е паметен стилски трик, но да се направи R5 автомобил со три врати би значело навистина да се ограничи неговата привлечност. Секако, задните седишта имаат ограничен простор за колена, но не и кога се гледаат заедно со други автомобили со иста големина.
Штета што нема порти за полнење телефони или дифузори за воздух, но барем подот е рамен по целата должина. Задните седишта се делат и преклопуваат во сооднос 60:40 во случај да треба да носите гломазен или подолг товар што не може да се вклопи во багажникот. Инаку, може да собере до 326 литри, вклучувајќи корисен дел под подот што лесно ќе ги проголта сите кабли за полнење.
Возејќи го Renault 5 E-Tech Iconic
R5 се чувствува добро од првиот момент кога ќе го повлечете селекторот за погон надолу за да тргнете. Управувањето е директно и добро избалансирано, но никогаш нервозно, додека одговорот на педалата за забрзување е брз, па затоа лесно е да се вози непречено, дури и во ситуации на запирање-стартување.
Тоа е потпомогнато од совршено калибрираните сопирачки. Иако тие комбинираат регенеративно сопирање за полнење на батеријата, и можете да изберете подобрено ниво на тоа користејќи ја поставката за возење „B“. Педалата секогаш се чувствува конзистентно и инспирира доверба. Видливоста во сите правци е исто така добра, олеснувајќи го возењето.
Електромоторот работи мазно и тивко и обезбедува силен напон што значи дека можете да излезете од раскрсници во густ сообраќај со малку стрес. Неговите мали димензии значат дека е лесно да се најде место за паркирање. Нерамниот асфалт понекогаш предизвикува нагласени вибрации, но тоа не е доволно за да се намрштите и автомобилот никогаш не е вознемирен.
Renault 5 е направен првенствено за град. Секако дека многу добро се снаоѓа и на отворен пат. Оставете го градот зад себе и тргнете по автопатот и ќе видите дека релативно скромната максимална моќност од 150 КС е сосема соодветна за овој автомобил. Тоа е делумно затоа што Рено успеа да ја одржи тежината на 1,5 тона и делумно поради природата на моменталниот вртежен момент на електричниот мотор од 245 Nm.
Впечатливо е што се покажува како порафиниран во ова сценарио од некои автомобили со премиум амбиции. Електричниот мотор е едвај чуен, акустичната шофершајбна помага ветерот да е стишен, а нема ни многу бучава од гумите на различни површини. Релаксацијата е додадена од еластичноста на суспензијата, која нежно се движи со патот, наместо да се бори против него.
Максималната брзина му е ограничена на 150 км/ч. На кривулест пат Renault 5 го оправдува спортското наследство на својот легендарен амблем. Управувањето е брзо, така што автомобилот се чувствува желен да сврти, а нема никакво навалување на каросеријата, што ви дава самодоверба да се забавувате во свиоците.
Електричен досег и полнење
Возениот Renault 5 има батерија од 52 kWh со мотор од 150 КС и декларира автономија од 410 километри. Со едно полнење на батеријата успеав да поминам над 360 километри, а за воља на вистината, од нив извозев 140 километри на автопат.
Доколку поголемиот дел од возењата се во урбана средина, тогаш повеќе од реално е дека ќе се поминат декларираните километри. За полнење на батеријата од 15 до 80% на полнач од 100 kW доволни се 30 минути. Сепак нив ги има малку низ државава, па пореално е за истиот капацитет да одвоите 195 минути на полнач од 11 kW.
Колку чини Renault 5 E-Tech Iconic?
Со почетна цена од 30.000 евра Renault 5 E-Tech е еден од најповолните електрични автомобили на пазарот. Ова се однесува на изведбата со далеку пониско ниво на опременост, со батерија од 40 kWh и 120 КС.
Возениот модел е опремен со нивото на опременост Iconic, кое е само едно скалило под врвната изведба. Листата на опрема е долга, а во користењето јасно се чувствуваат благодетите од неа. Иако не ја добив официјалната цена, моја претпоставка е дека за неа ќе треба да се одвојат 40.000 евра. Денеска ретко кој купува автомобил со еднократна целосна уплата на целата сума.
Преку Шпаркасе Лизинг со учество од 8.900 евра ќе ги добиете клучевите на Renault 5 E-Tech Iconic за 24 часа, а ратата изнесува 494 евра на 82 месеци. Овака поставената пресметка дава смисол и го прави овој убавец поблизок.
Заклучок
Renault 5 E-Tech Iconic е брз и агилен низ градот. Поради малите димензии е идеален за возење низ урбаната џунгла и лесно се паркира. Доволно е рафиниран и стабилен за да ги направи патувањата по автопат без напор, а фантастично е забавен за возење низ свиоци благодарение на остриот управувач и идеално избалансираната суспензија. Сè на сè, Renault 5 E-Tech Iconic е едноставно фантастичен електричен автомобил. Зрачи со шарм и ќе ви стави насмевка на лицето секој пат кога ќе седнете зад воланот.
