Јапонска техника, американски дизајн

Во склоп на својот план до 2030 година да има портфолио од 30 електрични возила, Honda ги објави првите фотографии на новиот кросовер кој треба да се комерцијализира во Северна Америка во текот на 2024 година.

Prologue ќе биде достапен со погон на сите тркала, наменет е за клиентите кои сакаат разновидност во употребата што го овозможуваат кросоверите со еколошки бенефит од нулта емисија на штетни издувни гасови. Надворешниот и внатрешниот изглед е дело на дизајнерскиот тим на Honda со седиште во Лос Анџелес.

Во Северна Америка, Honda постави временска рамка за воведување ЕВ врз основа на три почетни фази кои водат до 2030 година и на крајот до 100% продажба на автомобили со нулта емисија до 2040 година.

Во ова се вклопува договорот за основање заедничко вложување за производство на литиум-јонски батерии во САД за напојување на моделите што ја носат значката на Honda и Acura EV за тамошниот пазар. Моделот Prologue е нешто поголем од CR-V и се очекува дека ќе биде вистинска мерка за потребите на американските купувачи.