Три плус девет

Ревидираната серија 8 одеднаш се појави во дури дванаесет изведби

Токму така, дванаесет изведби кои произлегуваат од три индивидуални типови на каросерија е новиот пристап на BMW во сегментот на луксузни перформансни возила. Серијата 8 секогаш била и останала нешто посебно што го нудат Баварците.

Мускулозната појава е крунисана со атлетска елеганција, перформанси за кои не треба многу да се дебатира и луксуз својствен на лимузина. Токму затоа во еден здив се претставени купе, гран-купе и кабрио изведбите опремени со последниот збор на конективните технологии и електронски асистенти на возачот. Секоја од нив има специфики прилагодени во типот на каросеријата, но и во основната изведба нагласен е луксузот, ергономијата и динамиката на возење. За тоа се задолжени три мотори, еден автоматски менувач и опционален погон на сите тркала.

Најсилниот двигател е резервиран за изведбата M850i xDrive. Осумте цилиндри поставени во V форма испумпуваат 530 коњи на сите тркала. Три литрениот линиски шестак е задолжен за движење на изведбите со ознака 840i чии 333 КС може да се пренесуваат на задните тркала или на двете оски. За многумина изненадување беше задржувањето на дизелскиот би-турбо мотор со 340 КС со ист избор на пренос како кај послабиот бензенец. Трите каросериски концепти се дотерани во спортскиот дух на BMW изразен преку изведбата M8 Competition.

На прв поглед забележлива е концептуалната разлика на аплицираните материјали во интериерот. Трите врвни изведби имаат филигрански дотерани возни својства направени за емоционално возачко доживување. Потпишани од M GmbH тие ветуваат вонземски искуства обезбедени од V8 со двојно турбо кој мобилизира 625 коњи и масивни 750 Nm. Тоа е доволно спринтот од мирување до 100 км/ч да го апсолвира за само 3,2 секунди.