Специјално за своите кинески купувачи официјално е претставен прв сериски модел под новиот подбренд AUDI
За да се прилагоди на кинескиот пазар, кој е од големо значење за марката од Инголштад, Господарот на прстените се ребрендира и стана само AUDI.
На саемот на автомобилите во Шангај претставен е првиот сериски модел наменет исклучиво за најголемиот светски пазар. Создаден е во партнерство со кинеската SAIC, ексклузивниот караван е електричен и доаѓа во конфигурации со погон на задните и на сите тркала со максимална автономија од 770 км. Иако по големина е сличен на A6 Avant, со должина од 4.881 мм, Е5 Sportback е повеќе од обичен e-tron.
Изграден е на платформа развиена преку соработка помеѓу Audi и SAIC, со цел да се комбинираат најдобрите решенија од Германија и Кина. Основата на ова е новиот AUDI оперативен систем кој работи на чипот Qualcomm Snapdragon 8295 и се прикажува на масивен 27 инчен 4K екран што ја опфаќа целата широчина на кабината. Тој е прилагоден на уникатниот кинески екосистем на напредни, домашни апликации, кои се движат од портали за плаќање до услуги за пораки.
Друго значајно мерило според кое се оценуваат премиум автомобилите продадени во Кина се нивните способности за автономно возење. AUDI E5 Sportback има пакет LiDAR сензори, кои се специјално прилагодени за уникатните предизвици на урбаните патишта во Кина. Системот може да детектира трицикли и возачи за испорака на две тркала. AUDI, исто така, располага со асистент за паркирање кој може да ги меморира патеките низ катните паркиралишта и да се движи до одредено место пред самиот да се паркира – одлична карактеристика за оние кои живеат во бетонските џунгли во Кина.
Техничките спецификации и опциите на AUDI E5 Sportback имаат неколку сличности со веќе присутните карактеристики во линијата на Audi. Се одликува со архитектура за полнење од 800 волти што може да ви донесе 370 километри за само 10 минути, слично на онаа што се наоѓа на Premium Platform Electric која е основа на A6 e-tron и Q6 e-tron. E5 Sportback ќе биде достапен во четири варијанти со заден и со погон на сите тркала. На купувачите ќе им бидат понудени моќности од 299, 407 и 578 КС.
Врвната изведба ќе достигне 100 км/ч за само 3,4 секунди. Најголемата понудена батерија ќе биде 100 kWh, со максимален опсег на возење од 770 км според кинескиот циклус на тестирање. AUDI E5 Sportback има воздушно потпирање, а ќе има и опција за управување на сите тркала. Продажбата започнува за неколку месеци и ќе служи како камен темелник на брендот AUDI.
