Најбрзиот и најмоќниот кабриолет со преден мотор на светот
По повод 60 годишнината на моделот, Aston Martin ја претстави кабриолет верзијата на Vanquish. Исто како купето, така и Volante, е претставен како најбрзиот и најмоќниот сериски автомобил со преден мотор.
Добрите познавачи на овој сегмент ќе се запрашаат зарем не е тоа Ferrari 12Cilindri Spider? Тој има максимална брзина 340 км/ч и спринта до стотка за 2,9 секунди! Рака на срце, Aston Martin е малку побавен од место, апсолвирајќи го спринтот од 0-100 км/ч за 3,4 секунди, но крајната брзина му е за 4 км поголема од „разиграното коњче“ и бележи 344 км/ч.
Под хаубата се наоѓа 5,2-литарскиот V12 твин-турбо мотор на Vanquish, кој генерира громогласни 835 КС и 1.000 Nm вртежен момент преку осум степен автоматски менувач кој ја дистрибуира силата на задните тркала преку електронски надгледуван диференцијал.
Шасијата е засилена за да се надомести недостатокот на фиксен покрив, но зголемувањето на тежината, за овие прилики, е само 95 килограми во споредба со купето. Рамнотежата на тежината е променета, па инженерите на Aston Martin ја реконструираа суспензијата со адаптивните амортизери Bilstein DTX.
Изгледот е субјективна работа, но Volante верзиите на моделите на Aston Martin обично се посекси од нивните купе каросерии. Таков е случајот и со новиот Vanquish Volante, при што покривот од ткаенина помага да сјаат пропорциите и ги истакнуваат извајаните линии на профилот.
Преклопливиот покрив за 14 секунди се спушта, иако е изработен од ткаенина акустично е подобрен, нуди споредлива топлинска изолација со купето. Внатрешноста со две седишта е пренесена од Vanquish. Опремата вклучува двојни екрани од 10,25 инчи и специјално дотеран аудио систем Bowers & Wilkins со 15 звучници.
Се разбира, купувачите имаат пристап до безброј опции за персонализација, а првите примероци стигаат во третиот квартал на годинава. Сепак Volante нема да се произведува во голем број, бидејќи целото семејство Vanquish ќе има производство од помалку од 1.000 примероци годишно.
