Празнување на теренски начин

Велигден за американските љубители на теренското возење е најголемиот празник.

Предизвикани од совладувањето на исклучително тешките терени, љубителите на авантура традиционално се собираат во гратчето Моаб во сојузната држава Јута и во неговата околина  на настан кој трае девет дена.

Дебело поддржан од Jeep на него производителот се претставува со плејада концепти, за секого по нешто. Има такви со кои главно се промовираат додатоците за секаков вид надградби на гамата теренци, но и некои кои најавуваат нови модели или технологии.

Најинтересен годинава сепак беше наново заживеаниот примерок на Cherokee стар скоро половина век, во кој инженерите на Jeep вградија дволитарски плаг-ин бензинец комбиниран со два електромотора и осумстепен автоматски менувач. Внатрешноста е модерна но во целост задржувајќи го својот рустикален концепт верно ги доловува трендовите популарни во седумдесеттите години.

Друг интересен експонат беше луксузниот Grand Wagoneer Overland со конструкција на покривот која со притисок на копче се претвора во еден вид шатор за преспивање. Во кабината се отстранети вториот и третиот ред седишта, а зголемен е и клиренсот за полесно да се стигне до посакуваните терени за кампување.

Од другите покажани концепти треба да се споменат третата итерација на електричниот Magneto и нему сличниот Scrambler 392 задвижуван од 6,4 литарски V8. Поставата беше дополнета и со неколку храбри изведби на Gladiator и Wrangler, за кои компонентите за нивни модификации гои подготви Mopar.