Предност имаат најпрофитабилните

Jaguar Land Rover го намалува производството во своите британски фабрики до март поради недостаток на чипови и полупроводници. Во овој момент ќе се даде приоритет на  моделите што му носат поголем профит. Сегашната ситуација не е финансиски поволна за оваа марка, па се прават маневри да се избегне колапсот на производството. Одлучено е да се намали производството на моделите Range Rover Velar и Jaguar F-Pace, а истовремено да се зголеми производството на најпрофитабилните модели, Range Rover и Range Rover Sport.

JLR, исто така, може да го намали производството на подостапните модели Evoque и Discovery Sport, иако конечната одлука не е донесена. Производството во фабриката Нитра во Словачка, каде се прави теренецот Defender засега не е засегнато. JLR не планира да укине ниту едно работно место во своите фабрики во Обединетото Кралство како резултат на намаленото производство бидејќи планира обемот на работа да се зголеми кога ќе се нормализира снабдувањето со чипови. Недостигот на полупроводници ги остави клиентите на најновата генерација Range Rover да чекаат повеќе од година за нивните возила, со прекин на продажбата на некои варијанти.

Минатиот квартал JLR пријави дека заостанува со испораките до дилерите за 17 проценти. Претходно месецов, поранешниот извршен директор на JLR, Тиери Болоре, поднесе оставка само две години откако ја презеде улогата, а како образложение се наведува падот на призводството поради недостигот на компоненти.