Пролетна офанзива на Kia

Со отворањето на новиот салон, возилата на Kia повторно се враќаат во Струмица

Објавено на 31 март 2019 година

Киа Моторс Македонија го исполни даденото ветување – отворен е нов продажен салон во Струмица. Лоциран е пред самиот влез во градот и со своите 400 квадратни метри на купувачите ќе им овозможи квалитетно запознавање со гамата на корејскиот производител. Според зборовите на директорот Владимир Билбилов планот е да се понуди услуга на еднакво ниво како и во импортерскиот центар во Скопје. Заради тоа е одлучено место дилерство да се оди со сопствен продажен салон. Наскоро ќе биде отворен и сервис кој ќе биде опремен за редовно одржување на возилата и основни механичарски зафати. Снабденоста со резервни делови ќе ја следи структурата на возниот парк од оваа марка во регионот.

На свеченото отворање на новиот салон на кое присуствуваа бројни гости и претставници на медиумите, официјално беше најавено претстојното проширување на понудата на Kia со Shooting Brake верзијата на Ceed и интересниот Niro. Првиот модел кој провоцира со својата концепција ќе пристигне наскоро, додека двете хибридни и електричната верзија на кросоверот Niro ќе го збогатат присуството на марката во текот на есенва.