Mercedes настапи со македонски бои
Македонскиот дизајнер Славче Таневски премиерно во Женева го претстави своето ново дело
Објавено на 5 март 2019 година
Нашиот Славче Таневски на салонот на автомобили во Женева пред светската јавност утрово премиерно го претстави своето ново дело Mercedes-Benz CLA Shooting Brake. Тој својата презентација ја за почна со своите први цртежи од само 2-годишна возраст, кусо објаснувајќи ги своите визуелизации за автомобилите. Славче е еден од најмладите членови на врвниот тим на дизајнери на Mercedes каде досега самостојно креираше неколку модели за најстариот автомобилски бренд во светот.
Новиот CLA Shooting Brake е попрактична интерпретација на четиривратното купе чија нова генерација беше претставена во Лас Вегас. Изразениот стајлинг доминира и ги сокрива зголемените димензии – должината и широчината за околу 5 сантиметри. Поголемо е и меѓуоскиното растојание кое на CLA Shooting Brake му подари пораскошен простор во ентериерот. Таму изненадувања нема – организираноста е иста како и кај неговиот механички донатор, од кој се преземени целокупната погонска понуда и електронските асистенти. За пофалба е и коефициентот на отпор на воздухот, кој е задржан на минимални 0,26.
Mercedes CLA Shooting Brake во продажба ќе се најде во септември.
