Две години откако ја отвори фабриката во војводинска Инѓија, Toyo Tire одлучи целото свое европско работење да го пресели во Србија
Јапонскиот производител основа нова компанија која од почетокот на идната година постепено ќе ги презема обврските на сите подружници на компанијата во Европа, почнувајќи од централата во Германија. За почеток од Србија ќе се раководи со продажбата и маркетингот, а подоцна таму ќе се развиваат и новите производи. Паралелно со тоа ќе бидат затворани претставништвата на компанијата во Холандија, Италија и Велика Британија со што од Србија ќе се управува со целосниот европски бизнис на Toyo Tire. Дури и повеќе бидејќи фабриката во Инѓија произведува пневматици и за американскиот пазар кој за компанијата е најзначаен.
Инвестициите на Toyo Tire во Србија достигнаа скоро 400 милиони евра. Фабриката која вработува околу 600 луѓе има капацитет за производство на пет милиони пневматици годишно. Во склоп на неа се наоѓа и тест патека долга 1.690 метри.
