Продолжува освежувањето на гамата на Land Rover – најнов во серијата е најмалиот модел во понудата на Range Rover.
Иако доста добро се продава, Evoque е на пазарот цели четири години и беше неминовно да биде обновен. Британците му доделија изменет изглед карактеристичен по новата маска, потенките но поефикасни светла и поедноставените стилски елементи.
Внатрешноста е минималистички преуредена со друга централна конзола и нов инфо-забавен систем со закривен дисплеј. За разлика од досега преку него ќе се управува со сите функции на возилото така што менувачот остана осамен како единственото нешто со физичка контрола.
Големо внимание е посветено на материјалите, но не толку и на механиката. Во понудата погонски агрегати ќе останат познатите благи бензински и дизел хибриди со 160 и 200 коњи, додека на врвот е унапредениот плаг-ин кој испорачува повеќе од 300 коњски сили.
Нарачките за вака освежениот Range Rover Evoque веќе се примаат во продажната мрежа на марката, по цени кои се значително повисоки од досегашните. Идната генерација на овој модел која ќе има и електрично издание се очекува најрано во 2026 година.
