Поплавите во Јапонија го запреа производството на автомобили

Објавено на 11 јули 2018 година

Разорните поплави во Јапонија во кои фатално настрадаа 90 луѓе а уште 50 се водат како исчезнати, нанесоа голема штета и на автомобилската индустрија. Оваа природна катастрофа доведе до привремено запирање на производството во најмалку пет фабрики, главно во западниот дел на земјата во регионите на Хирошима, Кјото и Јамагучи. Покрај нив загрозено е и подрачјето на Осака. Извештаи за прекинато производство пристигнаа од Mazda, Nissan, Mitsubishi и Daihatsu, при што како причини се наведуваат стравувањето за безбедноста на работниците, прекинатите сообраќајни врски и проблемите во снабдувањето со компоненти. Според проценките, тешко веројатно е во текот на неделата производството повторно да биде покренато.