Како што вети, Lancia со малиот Ypsilon се враќа во светот на рели натпреварите. Адутот со кој ќе се предизвикаат конкурентите веќе е подготвен и ја носи традиционалната ознака HF.
Наменет е за младите возачи кои допрва треба да се докажуваат и има 1,2 литарски трицилиндричен турбо мотор со 212 коњски сили, петстепен менувач и механички диференцијал со ограничено пролизгување. Ќе настапува во Rally 4 категоријата а ќе биде организиран и посебен Trofeo Lancia куп за кој ќе се возат шест трки.
Шампионот ќе има можност да настапува за официјалниот тим на Lancia на европското рели првенство 2026-та година. Цената на автомобилот е поставена на 74.500 евра. За оние пак кои сакаат само да го почувствуваат адреналинот подготвена е друмска верзија. Таа има електричен погон со 280 коњи кои обезбедуваат огнено забрзување до сто на час за 5,8 секунди.
Дизајнот е инспириран од најрадикалните рели модели од минатото на марката, а за подобри перформанси ослонувањето е спуштено и трагите на тркалата се проширени. За фино подесуавање на обата модела беше ангажиран легендарниот рели возач Мики Биасион.
