Со амбиции да го лансира и во Европа, Kia ја претстави втората генерација на глобално популарниот Seltos.
Корејците овој кросовер го опишуваат како експресивна алтернатива на бестселерот Sportage, со нагласен лајфстајл карактер и практична функционалност.
Дизајнот му е привлечно робусен со преден дел со широка маска. Силуетата е со лебдечки покрив и изразени задни крила а светлата назад вертикално се протегаат од страна визуелно проширувајќи го возилото.
Внатрешноста има ниска и хоризонтално обликувана командна табла, задните седишта се подесливи под агол од 24 степени а во багажникот собира солидни 536 литри. Платформата е позајмена од Niro и Hyundai Kona а моторната понуда вклучува 1,6 литарски турбо со 180 коњски сили спарен со шестстепен мануелен или седумстепен менувач со двојна спојка и негова 193-коњска верзија со осумстепена автоматика.
Постои и дволитарски атмосферски бензинец со 149 коњски сили кој во Европа нема да се нуди но затоа ќе пристигне и хибридна варијанта, веројатно со погонскиот склоп од Niro со системски 140 коњски сили.
Погонот на сите тркала со задно мултилинк ослонување и режими за возење по снег, кал и песок е опционален. Ќе се произведува во Индија каде ќе биде пазарното деби по што ќе следат Кореја, Северна Америка, Европа и Кина.
Се очекува на Стариот Континент да бидат пласирани околу 60.000 примероци годишно.
