EuroNCAP за прв пат тестираше како работат електронските асистенти кај помалите комби возила.
Под лупа беа ставени повеќето модели активни на пазарот, меѓу кои имаше и потполно електрични.
Покрај класичното кршење на доставните возила, испитувањата беа посебно фокусирани на техничките системи за спречување несреќи а оценките иако можеби очекувани, благо кажано се дискутабилни.
Генерално може да се каже дека бидејќи ваквите возила имаат и свои патнички изведби, нивото на безбедност кај нив е добро.
Но не кај сите – цената на овие возила е битен фактор и производителите за да бидат поконкурентни знаат да скратат по нешто и да ги нудат безбедносните системи како опција.
Според EuroNCAP посебен проблем е што дилерите не ги охрабруваат купувачите да доплатат за нив, како што тоа знаат да го прават кај патничките автомобили.
Ако се погледнат подобро резултатите ќе се забележат големи разлики меѓу оценките за безбедноста што ја нудат возилата, произлезени токму од различното ниво на нивната опременост.
Со оглед на постигнатото, EuroNCAP ги повикува производителите да ги направат безбедносните електронски системи подостапни во оваа категорија возила.
