Во време кога повеќето производители кројат планови како најбезболно да преминат на електричните возила, BMW е дециден дека уште може да се извлече од моторите со внатрешно согорување. Тим инженери на германската марка веќе работи на нова генерација бензински и дизел агрегати со четири, шест и осум цилиндри наменети главно за поголемите модели.
Тие во понуда ќе останат и после наредната деценија на пазарите што ќе ги бараат, како што е Кина. Во Европа пак производството на овие мотори нема да се одвива во Германија туку во Австрија и Велика Британија бидејќи главната фабрика во Минхен се трансформира за електрични возила. Истовремено од перформансното М-одделение на баварската компанија е потврдено дека ќе се исфрлат менувачите со двојна спојка, додека мануелните ќе останат уште шест или седум години.
