Кој може да ги сфати Американците?

Најновиот извештај на американскиот автомобилски клуб вели дека во последниве месеци бројот на возачи што останале без гориво среде пат е зголемен за 60 отсто. Причината е рекордно високата цена која се искачи над 5 долари за галон, што е нешто под 80 денари за литар. Но не дека Американците немаат пари – подеталната анализа открила дека најголем дел од возачите останале без гориво затоа што како и порано полнеле за 20 долари, без притоа воопшто да помислат дека сега за тие пари добиваат помалку. Конкретно, лани ова време за наведената сума точеле по околу 25 литри, а сега само 15. Прашањето зошто воопшто не гледале во стрелката за количината гориво во резервоарот останува неодговорено.