Некогашниот чешки бестселер се препороди во дизајнерска визија
Škoda 100 која и кај нас беше доста популарна беше првиот модел на марката произведен во повеќе од милион примероци. Успехот е поголем кога се знае дека беше наменет исклучиво за источноевропските пазари. Неговиот легендарен статус го инспирираше дизајнерот Мартин Пацлт да подготви модерна реинтерпретација која ги задржа механичките поставки но доби пропорции на Superb.
Работата не му беше лесна заради предизвикот што тоа е автомобил на кој многумина се сеќаваат и сé уште го сакаат заради своите чисти безвременски линии. Но иако тие одекнуваат во сегашниот дизајнерски јазик Modern Solid, тој вешто успеа да ги избегне облиците слични со концептот Vision O на кој беше ангажиран. Успеа да го избегне и ретро-стилот но ја зачува суштината на оригиналот – неговата реинтерпретација остана класична лимузина со елегантни површини.
Неконвенционална карактеристика е задниот дел изведен со смела идеја задното ветробранско стакло да се изостави. Интегрираше и систем за довод на свеж воздух со минималистички отвори на задните крила што укажува на тоа дека како и некогаш моторот е сместен назад што пак како технички решение овозможи предната оска да биде поместена понапред. Багажникот се разбира е напред а мал простор се наоѓа и назад над електричниот погонски систем.
Јасно, модерната Škoda 100 постои само во компјутерите на дизајнерскиот центар на чешкиот производител каде ќе остане засекогаш без шанса како креација да се појави во реалниот свет во било каков облик.
