Четири врати за „семејно“ тркање

Три години по дебито, Mercedes AMG GT доби верзија со четири врати

објавено 24. јуни 2021

Првично изведен од моделот SLS пленеше со својот изглед и перформанси. Сега каросеријата стана елегантна и спортска и напуштена е основата од претходникот поради поинаков пристап. Имено, новиот дериват е хечбек, има четири врати и се потпира на Е-класата.

Сега GT влегува во втората половина од својот живот со дотерување за сладокусците на перформансите, но и традиционалниот раскош својсвтен за Mercedes. Магичните три букви ја ажурираа оваа изведба. Со потпис на AMG ревидирани се боите на каросеријата, а за верзијата со осум цилиндри следува комбинација која ја леди крвта во жилите, било да се гледа од надвор или од внатре.

Покрај свежите бои, во ентериерот се одликува и новиот волан AMG со поголеми лопатки за менување. Инаку сè останува исто. Инфо-забавниот систем беше ажуриран минатата година. Шасијата профитира од новиот систем на амортизери со одделно контролирани фази на враќање и компресија.

Ова значи дека разликата помеѓу удобно и спортско возење може да се мобилизира со едно притискање на копче и е значително поизразено отколку порано. Свиленкаст мазен 3.0-литарски шест-цилиндричен мотор со хибридизација од 48 волти продолжува да обезбедува погон како кај GT 43 со 367 КС додека преносот на силата на задните или на сите тркала е резервиран за GT 53 со 435 КС.

Наскоро треба да следат V8 варијантите GT 63 и GT 63 S кои веќе се подготвуваат со очекувани 585 и 639 коњи. Најсилна ќе биде хибридната варијанта GT 73e, која го комбинира V8 моторот со хибридна подршка, како што ќе биде случајот на претстојниот C 63. Овој модел треба да има најмалку 800 коњи и да биде светилник за електрификација, иако многумина поклоници на AMG тоа гледаат со скептицизам.