Без чудење, молам!

Објавено на 25 јануари 2018 година

Откако ја изгради репутацијата на најбрз теренец во светот, од годинава Bentley Bentayga ќе биде достапен и со 4-литарскиот V8 мотор од Porsche Panamera Turbo. Иако со своите 550 коњски сили е многу блиску до големиот W12 агрегат, тој е наменет за порационалните купувачи. Нуди слична доза адреналин илустрирана со забрзувањето до сто за 4,5 секунди и максималните 290 километри на час. Погонот и понатаму е на сите тркала, преку 8-степен автоматски менувач. Деактивирањето на цилиндрите и старт-стоп системот овозможуваат во техничките податоци да биде наведено дека просечно троши 11,4 литри гориво на сто километри. Карбон-керамичките сопирачки со дискови од 440 милиметри напред и 370 назад располагаат со клешти со 10 клипа. Сместени зад 22-инчни тркала, за нив од Bentley истакнуваат дека се најголеми вградени во сериски автомобил. Освен во поедини детали, Bentley Bentayga V8 визуелно скоро да не се разликува од неговите W12 и TDi верзии. На салонот во Женава во март се очекува и plug-in хибридна варијанта.